“Болор цом-36” наадамд 27 найрагчаас хэн нь цойлох вэ?

Монголын Зохиолчдын Эвлэлээс жил бүр уламжлал болгон шилдэг яруу найраг, шилдэг шүлэгчийг тодруулдаг утга уянгын их “Болор цом” наадмыг зохион явуулдаг билээ. Энэ жилийн "Уран үгсийн чуулган" богино өгүүллэгийн наадам маргааш, "Болор цом-36" наадам Говь-Сүмбэр аймагт энэ сарын 5-нд зохион байгуулагдахаар товлогджээ. МЗЭ-ийн 90 жилийн ойн баяр тохиож буйтай уг наадам давхцаж байгаараа онцлог юм.

Наадамд яруу найрагчид бүтээлээ сойн “уралдсанаас” 27 найрагч тунаж үлдэн тэргүүн байрын төлөө өрсөлдөхөөр болсон байна. Утга уянгын энэ наадмыг 1983 онд Ардын уран зохиолч Дэндэвийн Пүрэвдорж анх санаачлан зохиож “Хүн төрөлхтөнд хүргэх шүлэг”-ээрээ тэргүүлж байсан түүхтэй.

Удаах жил нь Дөнгөтийн Цоодол “Нэр нь тодроогүй баатрууд”, дараа жил нь Бавуугийн Лхагвасүрэн “Шагнал” шүлгээрээ тэргүүн найрагч болж, тэр цагаас хойш ард түмний сэтгэлд хоногшсон олон арван найрагч төрөн гарсан юм. Өдгөө энэ наадам жил бүр шилдэг яруу найраг, шилдэг шүлэгч тодруулдгаараа монгол түмний хайртай наадам болжээ.