25 жилийнхээ ойгоор “Никитон” хамтлаг Төв цэнгэлдэхэд тоглоно

Урлагийн гавьяат зүтгэлтэн Б.Батчулууны ахалсан “Никитон” хамтлаг энэ жил 25 нас хүрч байна. Хамтлаг байгуулсан оныг 1993 он гэдэг боловч, тэгш тоотой болгон энэ жил тэмдэглэн өнгөрүүлэхээр болжээ.

14 настайдаа “Янаг цэцэг” дууг зохиож байсан Б.Батчулуун Хөгжим бүжгийн найз нартайгаа хамтран хамтлаг байгуулснаас хойш одоог хүртэл “Хос хунгийн дууль”, “Цамцаа тайл”, “Ялгуун”, “Нандин шүтээн”, “Үүлэн үст”, “Чи минийх” зэрэг зургаан цомог өлгийдөн аваад байна.

Хуучин гишүүдээс одоо хүртэл хамт байгаа нь төгөлдөр хуурч, хөгжмийн зохиолч Б.Чинбат болон аргил гитарчин Цогоо нар юм. Мөн 2017 оноос хойш хамтлагийн нэг эд эс болсон гоцлол гитарчин Өөжгийг дурдахгүй өнгөрч болохгүй.

Өнгөрсөн хугацаанд хийсэн бизнесийн томоохон амжилт нь Хүүхдийн паркад “Никитон” клубыг байгуулсан явдал юм. Тус клуб нь залуусын үйлчлүүлэх дуртай газрын нэг болоод байгаа.

25 жилийн ойн хүрээнд зургадугаар сард Төв цэнгэлдэхэд тоглолт хийхээр төлөвлөжээ. Мөн Европын аялан тоглолтын талаар ярилцаж байгаа ч эцэслээгүй байгаа аж.