М.Энхболдын хүмүүсийг "чөлөөлж" эхэлжээ

Хоёр жил шахам хугацаанд үргэлжилсэн МАНАН тэмцлийн эсрэг гэгддэг улс төрийн тэмцэл өнөөдөр гадна өнгөндөө "намдсан" гэж хэлж болно. Сар шинийн өмнөхөн УИХ-ын дарга М.Энхболдыг албан тушаалаас нь чөлөөлснөөр нийгэмд харьцангуй ил тэмцэл дарагдсан.

Гэвч "далд" тэмцэл өрнөсөөр байгаа аж. Хотын франкцын толгойлогч гэгдэх М.Энхболдын үед албан тушаалд тавигдсан зарим хүмүүс албан тушаалаа өгч эхэлжээ.

Жишээ нь Нийслэлийн Хот төлөвлөлт, ерөнхий төлөвлөгөөний газрын дарга бөгөөд Улаанбаатар хотын ерөнхий Архитектор Э.Анар үүрэгт ажлаасаа чөлөөлөгдсөн байна. Тэрбээр өөрийн хүсэлтээр гэх өнгөн дээрээ тайлбартай ч үнэн хэрэгтээ бусдын шахалтаар ажлаа өглөө хэмээн хотын захиргаа хавиар ил далд шивнэлдэж байна. 

Түүний араас ч "өөрийн хүсэлтээр" ажлаа өгөх албан тушаалтнуудын нэрс мэр сэр дуулдаж эхэлжээ. Тэдний жагсаалтыг Нийслэлийн өмчийн харилцааны газрын дарга Ч.Однасан тэргүүлэх бололтой. Мөн Нийслэлийн тээврийн газрын дарга Д.Отгонбаатар ч ажлаа өгөхөөр болсон аж.