Тереза Мэй огцрох өдрөө товлож байна
Их Британи улс Европын Холбооноос өрх тусгаарлах төлөвлөгөө Парламентын гишүүдээс дэмжлэг авч чадахгүй байгаа тул Ерөнхий сайд Тереза Мэй огцрох нь тодорхой харагдаж байсан юм. Брексит буюу Европын Холбооноос гарах төлөвлөгөөг дахин танилцуулж Парламентад санал хураах хугацааг сунгаж ирэх зургадугаар сарын эхний долоо хоногт болгосон. Уг санал хураалтын дараа Ерөнхий сайд огцорч дараагийн залгамжлагчийг сонгох сонгуулийн товыг зарлахаа албан ёсоор мэдэгдлээ.
Хатагтай Тереза Мэй өчигдөр Парламентын гишүүдтэй уулзаж тэдний огцрох шаардлагын хариуд дээрх тохиролцоонд хүрчээ. Ирэх зургадугаар сарын эхэнд болох Брекситийн санал хураалт бүтэлгүйтвэл гурав дахиа Парламентын дэмжлэгийг авч чадахгүйд хүрнэ. Өнгөрсөн жилийн сүүлчээр Консерватив намаас төлөөлөн Парламентад сууж буй гишүүд Ерөнхий сайдад итгэл үзүүлэх санал хураалт явуулахад тэрээр тэсч үлдсэн юм. Үүгээр энэ оны 12 сар хүртэл албан үүргээ гүйцэтгэх эрхээ олж авсан хэдий ч Их Британи улс Европын Холбоог орхих болсонтой холбогдуулан энэ зун гэхэд суудлаа тавьж өгөхийг шаардаж байна.
Тереза Мэйн дараагийн залгамжлагчийг сонгох сонгуульд Консерватив намаас Гадаад хэргийн сайд асан Борис Жонсон нэр дэвшихээ зарлаад байна. Тэрээр Тереза Мэйн зохион байгуулсан Брекситийн зөвшилцлийг стратегийн ач холбогдолгүй хэмээн үзэж хурцаар шүүмжлэгчдийн нэг юм. Одоогоор Их Британи улс ирэх 10 дугаар сарын 31-ний өдөр Европын Холбооноос өрх тусгаарлахаар товлож байна.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.