“Жаст”-ын “Ш.Батхүүгийн хэрэг” шүүх дээр яваа бол С.Баярцогт нарт холбогдох хэрэг шүүхэд шилжихэд бэлэн болжээ

Авлигатай тэмцэх газраас сар бүр зохион байгуулдаг хэвлэлийн хурал болж, олны танил болоод улс төр, бизнесийн нөлөө бүхий хүмүүсийн холбогдсон авлига, албан тушаалын гэмт хэргийн талаар сэтгүүлчдэд товч мэдээлэл өглөө. 

Тухайлбал, Эрдэнэт үйлдвэрийн 51 хувийг Өмнөд Африкийн "Стандарт" банкинд зарсан "Жаст групп"-ийн ерөнхийлөгч Ш.Батхүүтэй холбогдох гэмт хэрэг шүүхийн шатанд явж байгааг онцоллоо. Түүний "Стандарт банкинд" төлөх ёстой 140 сая долларын өрийг Монгол Улсын Засгийн газраас дарж, уг мөнгийг Ш.Батхүүгээс гаргуулахаар шийдвэрлэсэн. Гэвч өнөөг хүртэл шийдэгдээгүй байна. 

Уг нь Ш.Батхүүгийн хөрөнгийг битүүмжилж, 52 тэрбум төгрөгийн хөрөнгө хураасан талаар ЗГХЭГ-ын дарга Л.Оюун-Эрдэнэ мэдэгдэж байсан ч өнөөдрийг хүртэл улсын өрийг яг барагдуулсан эсэх нь тодорхойгүй байгаа юм. Юутай ч шүүхээр уг асуудлыг бүрэн шийдвэрлэх юм.

Харин Сангийн сайд асан С.Баярцогт, Ерөнхий сайд асан С.Баяр нарын олон нөлөө бүхий эрхмүүд холбогдон, удаа дараалан шалгагдаж байгаа "Оюутолгойн гэрээ"-тэй холбоотой хэргийн шалгалт дуусах шатанда орсон бөгөөд шүүхэд шилжүүлэхэд бэлэн болсон талаараа АТГ-аас мэдэгдлээ. Гэвч уг хэрэгт С.Баяр, С.Баярцогт нараас гадна чухам хэдэн хүнийг хамруулж байгаа талаараа тдоорхой тайлбар өгсөнгүй.