Түүхий нүүрс түлбэл 300 мянгаас гурван сая хүртэлх төгрөгөөр торгоно

Засгийн газраас өнгөрсөн онд 62 дугаартай тогтоол гаргаж, тэр хүрээнд төвийн зургаан дүүрэгт түүхий нүүрс оруулж, түлшинд хэрэглэхийг хориглосон билээ. Тогтоолын тус заалтыг маргаашнаас мөрдөж эхэлнэ. Тэгвэл энэ талаар НИТХ-ын Тэргүүлэгчдийн ээлжит хуралдаан болон ЦЕГ-аас мэдээлэл өгсөн юм.

Агаарын бохирдлыг бууруулахын тулд нийслэлийн удирдлага энэ онд 3.4 тэрбум төгрөг төсөвт суулгажээ. Сайжруулсан түлшийг нөөцлөх найман агуулах барихаар төлөвлөж, өдгөө тавынх нь бүтээн байгуулалтыг эхлүүлжээ. Үүний зэрэгцээ сайжруулсан түлш борлуулах цэгүүдийг шинээр бий болгож эхлээд байгаа аж.

Мод, түүхий нүүрс худалддаг 540 орчим цэг байсан бөгөөд тоог нь нэмэх бодлого барьж буй. Энэ сарын эхээр сайжруулсан түлш борлуулах цэгүүдийн эхний ээлжийг ашиглалтад оруулсан бол ирэх сарын сүүлчээр нэмж 100 цэг нээнэ гэдгийг Агаар, орчны бохирдлын асуудал хариуцсан төслүүдийн удирдагч Д.Мөнхжаргал танилцуулсан юм.

Цагдаагийн ерөнхий газраас таван дүүрэгт байрлах аж ахуйн нэгж, айл өрхөд байгаа түүхийн нүүрсний тоо хэмжээг гаргах судалгааны ажлыг эхлүүлсэн. Нийслэлийн авто постуудад хяналт шалгалтын ажлыг маргаашнаас хийж эхлэх гэнэ. Түүхий нүүрс ашигласан тохилдолд Зөрчлийн тухай хуулийн дагуу иргэнийг 300 мянган төгрөг, аж ахуйн нэгж байгууллагыг 3 сая хүртэлх төгрөгөөр торгох хуулийн зохицуулалттай юм байна.

Сайжруулсан түлш худалдах цэгүүдийн газрын асуудлыг шийдэж, тонн тутмыг нь 150 000 төгрөгөөс хэтрэхгүй үнээр иргэдэд нийлүүлнэ гэдгийг албаны хүмүүс онцоллоо.