Маргааш хөлбөмбөгийн дэлхийн аварга шалгаруулах тэмцээн эхэлнэ

Хөлбөмбөгийн дэлхийн аварга шалгаруулах тэмцээн түүхэнд анх удаа 48 баг оролцож, Америкийн Нэгдсэн Улс, Мексик, Канад гэсэн гурван улс дамнан зохион байгуулагдах гэж байна.

Тус томоохон спортын арга хэмжээний нээлтийн тоглолт Мексикийн нийслэл Мехико хотын алдарт "Ацтека" цэнгэлдэх хүрээлэнд талбайн эзэн Мексик болон Өмнөд Африкийн шигшээ багуудын хооронд орон нутгийн цагаар 13:00 цагт эхлэх юм.

Энэ удаагийн тэмцээн нь зохион байгуулагч гурван улс тус бүрдээ бие даасан нээлтийн ёслол хийх юм. Тэмцээний эхний өдөр Гвадалахара хотын "Акрон" цэнгэлдэх хүрээлэнд Өмнөд Солонгос болон Чехийн шигшээ багууд хүч үзэх хуваарьтай байна. Харин дараагийн өдөр нь Канадын Торонто хотын "BMO Field" цэнгэлдэхэд Канад болон Босни Херцеговин, АНУ-ын Лос Анжелес хотын "SoFi Stadium" цэнгэлдэхэд АНУ болон Парагвайн тоглолтын өмнө тус тус нээлтийн үйл ажиллагаа болно. 

Тэмцээний цар хүрээ өмнөх жилүүдийнхээс эрс томорсон бөгөөд нийт 104 тоглолт 39 хоногийн турш үргэлжилнэ. Оролцогч 48 баг 12 хэсэгт хуваагдан өрсөлдөх ба хэсэг бүрийн шилдэг хоёр баг, мөн хамгийн сайн үзүүлэлттэй гуравдугаар байрын найман баг хасагдах шатанд шалгарах дүрмээр тоглоно. Эдгээр тоглолтууд нь АНУ-ын 11, Мексикийн гурав, Канадын хоёр, нийт 16 хотын цэнгэлдэх хүрээлэнд явагдах юм. Өргөтгөсөн формат нь илүү олон улсын шигшээ багт дэлхийн тавцанд өрсөлдөх боломжийг олгож байгаа юм. 

Тэмцээний аваргын төлөөх шийдвэрлэх тоглолт Нью-Жерси мужийн "MetLife" цэнгэлдэх хүрээлэнд зохион байгуулагдана. 

Эх сурвалж:

• zindaa.mn

• si.com

• bloombergtv.mn

• inside.fifa.com

• wfdd.org